Valentinovo je, stara mamica gledido črez oblok i stiha velido:
-Hm, denes se ftičeki ženiju… Na tu misel mamici so se oči zasvetile i v času lice jim se pomladilo .Kak da jim je z brsačom nešči prebrisav sa stara leta i staj samo ona lepa, mlada. Tak pomlajeni, najempot so počutili da jim je bota i ne tre pak su ju prislonili k stolici i zagledali se naspram potni vroti de su zgledali svojega vnukeca i jegvu pucu, kak so se onak z rokom v roki kak deca i bez reči posmeknuli v hižu. Mamici je mom v očmi vgaslo i ze sema svojima letima na pleči, gledali so za jimi, vrteli z glavom i rekli:
– Da bi čovek jednu reč rekev…No, za čudej toga oni tak velido. A unda pak bormeš i velido i to ne jednu reč, nego celi šerek reči. A kak so oni več joko stara mamica, štera komaj hode, no, o tom jivom teškom hodenju melo bi se kaj reči. Jerbo, da de jiv vnukec dimo, a pogotovo, ako pak de, o kak ve ž njim puca, skoče oni kak mlada sneha i nikva bota jim je mom ne tre, a niti očole, a kajpak kaj najempot čujeju saku reč. Gledido, z glavom vrtido, a miseli ovakve i onakve roje jim se po glavi, nabiraju si i nabiraju i dok vnuka na samom zgrobe govore i pregovarjaju, kak da jih je što navinov:
– Sinek dragi, nikaj mi se to ne vidi, znam ja da sam stara, ali negda je to se drugač bilo. Te denešnje pucke… Se su nekve, joj, škoda reči. Išče si ne niti jednu dopeljav, ka bi mi se vidla. Se su lebutkaj… Kaj samo z sebe naprave? Znaš, negda dok sam ti ja bila mlada, mlajša od prvoga snega, a na glavi mi je bila kita tripot koli glave oplečena, a vu pojasu pak sam bila tenka kak gožva, z dve šake me ščepati bilo moči. Em velido, da sam i ja bila lepa, ali sam se bormeš drugač ponošala. A ti sinek si ve, kaktili nekov mladoženja… A mladoženja? To ti je tak, neti sim neti tam. Kak da te veter nese i ne znaš kam te bo dnesev… A pok čovek bez žene ti je i ne čovek. Joj, joj, nikaj dobra se ne kaže i se me strah kak boš itak zišev? Kakvu boš itak ženu dobiv… ? Vi denešnja deca, se bi šteli najempot meti. Smejete se vi, dok vam velimo da si je moči i f kolibi raja naprajti. Na te reči mamica bi si vek zdehnuli i bormeš i soza bi jim se sfrkala i oči bi hitili na venčanu sliku, de su oni z japicom, lepi i mladi. A vnukec bi jih gledav, malo se smejav, jerbo, po istini povedano, teško mu si je bilo zamisliti mamicu mlajšu od prvoga snega, pak bi jim rekev:
– No mamica, mamica, vi i prvi sneg, de samo te reči zmorete? Ne znam kaj to na vas deluje, mortik Valentinovo… A po pitanju toga, kaj vam se niti jedna moja puca do ve ne vidla, ne znam kaj reči, pak bi rekev kak i vi: da bi reč rekev. Ali ova, ova zodnja, vam se bo morala videti. Mislim, kaj mislim, nego sam siguren da bi si ž njom mogev, kak vi veliste i f kolibi raja stvoriti. Znate, mamica, niti jednu do ve sam ne mev tak rad kak ju… Cele dneve i noči mi je v pameti i čim se zbudim, mam je pred menom. Da pak se sretnemo, moje srce tak počne toči kak da me što buhle po prse. Se, se na joj pak mi je lepo i milo. I ona zlamenka na jejem vratu i ona bluzica na jejem teli, za štero vi veliste da ji je premala i ona kiklica, za štero pok veliste da ji je prekrotka i jeja lepa bela nogica, se se na joj mi se vidi… A to, kaj se vam ne vidi, meni vam je kak do lanjskoga prvoga snega.
– Tak veliš sinek dragi, morala mi se bo videti… Ali kak, kak mi se nek vidi ta tvoja preštimona damica? Pogledni ju samo… Nofti dogi, na kričeče namolane čobice, v nosu i vuhoj karike, a tak belo, bledo ličece. Ne se ona vroča vodice napila, net pak mi se vidi kaj bi za kakvo delo bila. Ne zameri, kak pre jeli, tak pre deli! Ne je ovo, niti ono, nego sam gledi šalatu v zdeli. Em je cela kak z bezgovoga speha. Sinek dragi, kaj ti bom rekla, ali posluhni ti mene, neti je ona vredna greha…
– Oj mamica, moja stara mamica! Ve pak bom ja nekaj vam rekev, kulko sam mev čuti i vi ste negda bili preštimana damica. Z čerlenim paperom ste si molali čobice, bleda ličeca ste si vek ščipali i šterkali poculice, šivali ste si svilne dudeke i zduce i si su rekli da ga v seli ne bilo gizdaveše puce. A somi ste rekli da vas je koli pojasa z dve roke ščepati moči bilo… Rečite mi, kaj je unda to za fajnu deklu bilo? Kaj ste unda i vi ne bili kak z bezgovoga speha? Ali su japica rekli da ste i te kak bili vredni greha…
Lijep pozdrav, vaša Magdalena
Magdalena Vlah-Hranjec
